Este yía’l segundu volumen ilustrau sobre mitoloxía llionesa que publica l’asociación cultural Faceira, llibru no que sigue con una riestra de figuras fantásticas del Reinu de Llión xunto a las suas liendas.
Bruxas, meigas, mouros, ánimas en pena ou homes y muyieres llobu, son dalgunas de las criyaturas fantásticas qu’aparecen continuamente nas liendas y cuentos de tradición oral de Llión, y tamién de Cabreira, craro; y este segundu volumen de l’Asociación Cultural Faceira trata tamién de los personaxes mitolóxicos del Reinu de Llión que los ñuesos mayores imaxinoron habitando en montes, pozos, peñas, cuevas, ruinas ou fuentes, y tien el propósitu de dar a coñecer d’una maneira prestosa al públicu mozu las liendas más significativas protagonizadas por dalgunos d’estos seres fabulosos.
Las formosas ilustraciones de la obra facilitan l’acercamientu de la ñuesa rica mitoloxía a la mocedá, buscando una canal d’expresión moderna pa qu’esti aspectu de l’antigua tradición oral de Llión perviva nas nuevas xeneraciones. Los sous autores son l’investigador de cultura tradicional Nicolás Bartolomé Pérez, quien apurre los textos; y l’ilustrador Ricardo Escobar Espiniella, autor d’unos guapos debuxos conos que consigue dar un espectacular resultáu que va facer d’esta obra, xunto cono volumen primeiru, un referente nos llibros de mitoloxía tradicional pa rapaces.